به‌ڕێوه‌به‌رایه‌تی بلۆگه‌ری "خه‌بات نه‌وزاد" ڕای گه‌یاند "به‌ڕێوه‌به‌رایه‌تی بلۆگه‌ره‌كه‌ی بڕیاری راگرتنی ده‌ركرد و له‌ بری ئه‌و ماڵپه‌رێكی فراوان /چاوگ نیوز/ كرده‌وه‌".

به‌ڕێوه‌به‌رایه‌تی بلۆگه‌ری "خه‌بات نه‌وزاد" ئه‌وه‌شی گووت "سوپاسی هه‌موو خوێنه‌رانی بۆلۆگه‌ره‌كه‌ ده‌كه‌ین كه‌ به‌دلسۆزانه‌ هاوكارمان بوون و تێبینی خۆیان به‌رده‌وام له‌سه‌ر ئه‌و بلۆگه‌ره‌ پێی گه‌یاندوین".

زیاتر ده‌لێن "به‌لێن ده‌ده‌ین له‌ چاوگ نیوز كاری باشتر بكه‌ین".

ناونیشانی چاوگ نیوز له‌ تۆڕی ئینته‌رنێت www.chnews.org
ناونیشانی چاوگ نیوز له‌ ماڵپه‌ری كۆمه‌ڵایه‌تی فه‌یس بووك chawg news

پەرلەمانتارێكى كورد لە بەغدا داواى گەڕانەوەى خێراى پەرلەمانتارانى كورد دەكات بۆ هەرێم

سەرچاوەیەك لە پەرلەمانى عێراق راى گەیاند، ئەوەى ئەمڕۆ لە سلێمانى روویدا ئاسایى نەبوو، بۆیە بۆ چاودێریكردنى دۆخى كوردستان سبەى داواى گەرانەوەى پەرلەمانتارە كوردەكان بۆ كوردستان دەكات.

بەكر حەمە سدیق پەرلەمانتارى عێراق لەسەر لیستى یەكگرتووى ئیسلامى كوردستان بەئاژانسى كوردستان بۆ دەنگوباس (ئاكانیوز)ى راگەیاند، رووداوەكانى ئەمڕۆى كوردستان ئاسایى نەبوون و دۆخى كوردستان نائارام دەكات. ئێستە سەرجەم پەرلەمانتارانى كورد لە بەغدا سەرقاڵى جێبەجێكردنى ئەركەكانیانن و لە هەمان كاتدا ئاگەدارى دۆخى ئێستەى هەرێمن و ناكرێ هەر لە بەغدا بمێنینەوە.

حەمە سدیق گوتى "داوا لە گشت پەرلەمانتارە كوردەكانى فراكسیۆنەكان لە بەغداى پایەتەخت دەكەم بۆ چاودێریكردنى دۆخە نا ئاساییەكەى ئێستەى هەرێم بگەڕێنەوە كوردستان. ئێمە پشتگیری لە هەموو خواستێكى ئازادانە دەكەین بەڵام نەك چاو لە ئەزموونى میسر و تونس بكرێ، چونكە هیچ مانایەكى نابێ و لۆجیك نییە".

فراكسیۆنى گۆڕان: مامەڵەكردن وەك یەكەى كارگێڕیی سەربەخۆ لەگەڵ هەڵەبجە پێچەوانەی یاسایە

سەرۆكى فراكسیۆنى گۆڕان لە پەرلەمانى كوردستان ڕاى گەیاند هەڵەبجە لە ساڵى 1997وە بڕیارى بەپارێزگەبوونى دراوە، حكوومەتى هەرێم یاسا پێشێل دەكات كە وەك یەكەیەكى كارگێڕیی سەربەخۆ مامەڵەى لەگەڵدا دەكات.

ڕێباز فەتاح سەرۆكى فراكسیۆنى گۆڕان لە پەرلەمانى كوردستان ئەمڕۆ پێنجشەم بەئاژانسى كوردستان بۆ دەنگوباس (ئاكانیوز) ى ڕاگەیاند، ئەم بڕیارەى ئەنجوومەنی وەزیران پێچەوانەى یاسایە و لە ساڵى 1997وە بەیاسا لە پەرلەمانى كوردستان ئەوە روون كراوەتەوە كە شارۆكەی هەڵەبجە بكرێتە پارێزگە، بەڵام حكوومەت ئەوەى نەكردووە و لە ئێستەدا وەك یەكەیەكى كارگێڕی مامەڵەى لەگەڵدا دەكرێت.

فەتاح كە خۆى خەڵكى هەڵەبجەیە گوتى "لە كۆبوونەوەى 7ی ئەم مانگە شوبات/فێبرایەرى ئەنجوومەنى وەزیراندا بڕیار دراوە مامەڵەى یەكەى كارگێڕیی سەربەخۆ لەگەڵ هەرسىَ شارۆكەی سۆران و هەڵەبجە و راپەڕین بكرێت، بەڵام پێشتر بەبڕیارى پەرلەمانى كوردستان هەڵەبجە كراوەتەوە پارێزگە، حكوومەت كەمتەرخەم بووە كە تا ئێستە ئەم بڕیارە جێبەجێ نەكراوە".

دانیشتوانى شارەدێى زەڕایەن لە خۆپێشاندانێكدا رێگەى سەرەكیى سلێمانى دەربەندیخان دادەخەن

ئەمشەو ژمارەیەك لە دانیشتوانى شارەدێى زەڕایەن (وارماوە)ى سەربەشارۆكەى شارەزوور خۆپیشاندانێكیان دەست پێ كرد و رێگەى سەرەكیى نێوان سلێمانى-دەربەندیخانیان داخستووە و بەڕێوەبەرى ناحیەى وارماوەش رای گەیاندووە، ئێستە لە فەرمانگەین و سەرقالى تاوتوێكردنی دۆخەكەین.

كەریم جەعفەر/رۆژنامەوان/ لە شوێنى رووداوەكەوە بەئاژانسى كوردستان بۆ دەنگوباس (ئاكانیوز)ى گوت، لە سات 20:30 بەكاتی ناوەخۆ (17:30 بەكاتی گرینیچ) ژمارەیەك لە گەنجانى شارەدێى زەڕایەن /35 كم باشوورى رۆهەڵاتى سلێمانی/ خۆپیشاندانێكیان لەسەر شەقامى سەرەكیى ناو شارەدێیەكە دەست پێ كردووە.

زیاتر گوتى، خۆپیشاندەران بەسووتاندنى تایە رێگەى سەرەكیى نێوان شارى سلێمانى-دەربەندیخانییان گرتووە و بەو هۆیەوە هاتوچۆى ئۆتۆمۆبێل پەكى كەوتووە، هەروەها ژمارەیەك لەو ئۆتۆمۆبێلانەى سووتەمەنى دەگوازنەوە بەردباران كراون.

پەرلەمانى عێراق لێژنەیەك بۆ لێكۆڵینەوە لە خزمەتگوزارییەكانى كۆمپانیاكانى مۆبایل پێك دێنێ

 سەرچاوەیەك لە پەرلەمانى عێراق ئەمڕۆ چوارشەم راى گەیاند پەرلەمانى عێراق لە دانیشتنى ئەمڕۆیدا لێژنەیەكى بۆ لێكۆڵینەوە لە خزمەتگوزارییەكانى هەرسىَ كۆمپانیاكانى پێوەندى لە عێراق /زین، ئاسیاسێل، كۆڕەك تیلیكۆم/ پێك هێنا.

بەكر حەمە سدیق ئەندامى پەرلەمانى عێراق لەسەر لیستى یەكگرتووى ئیسلامیى كوردستان بە ئاژانسى كوردستان بۆ دەنگوباس (ئاكانیوز)ى ڕاگەیاند لە دانیشتنى ئەمڕۆى پەرلەمانى عێراقدا پەرلەمانتارێك لەسەر لیستى عێراقییەى ئەیاد عەلاوى یاداشتێكى دایە سەرۆكایەتیى پەرلەمان كە تێدا ئاماژەى بەوە دا بوو كۆمپانیاكانى مۆبایل لە عێراق بەپێى ئەو بەڵێننامەیەى داویانە كار ناكەن.

حەمە سدیق گوتى پەرلەمانتارەكە گوتى پێشتر ئەو سىَ كۆمپانیایەى مۆبایل لە عێراق /زین، ئاسیا سێل، كۆڕەك تیلیكۆم/ بە پێى كەمكردنەوەیەك مافى كاركردنیان لە حكوومەتى عێراق وەرگرتووە كە هەموو ئەرك و مافەكانى تێدا دیارى كراوە، بەڵام ئێستە خزمەتگوزارییەكانى ئەو كۆمپانیایانە لە ئاست داواكارییەكانى هاووڵاتییاندا نییە".

هەڵەبجە.. سەرۆكى زانكۆى هەڵەبجە و جێگرەكەى دەست بەكار بوون

سەرچاوەیەك لە قایمقامیەتى شارۆكەى هەڵەبجە راى گەیاند، ئەمڕۆ چوارشەم سەرۆكى زانكۆى هەڵەبجە و جێگرەكەى لە سەرۆكایەتیى زانكۆى هەڵەبجە دەست بەكار بوون.

گۆران ئەدهەم قایمقامی هەڵەبجە بەئاژانسى كوردستان بۆ دەنگوباس (ئاكانیوز)ى راگەیاند، ئەمرۆ چوارشەم دكتۆر خەسرەو عەبدوڵا وەك سەرۆكى زانكۆى هەڵەبجە و دكتۆر محەمەد دلێر وەك جێگرى سەرۆكى زانكۆ هاتنە هەڵەبجە و لە پۆستەكانیاندا دەست بەكار بوون.

زیاتر گوتى، سەرۆكى زانكۆى هەڵەبجە و جێگرەكەى دواى گەیشتنیان بۆ هەڵەبجە چەند ناوچەیەكى سەر بەزانكۆكەیان بەسەر كردەوە و بەڵێنى كارى رژدیان دا لە پێناو خزمەت گەیاندن بەشارۆكەكەدا.

ئەدهەم روونی كردەوە، وەك قایمقامیەت بەڵێنمان داوە چەند بینایەیەك بۆ زانكۆكە دابین بكەین، بۆ ئەوەى بەشێوەیەكی كاتی كارەكانى تێدا بەڕێ بكەن تا ئەو كاتەى بینایەى تایبەت بەخۆیان كاری تێدا تەواو دەبێ و ئەوەش بۆ ئەوەى كارەكانى زانكۆ رانەوەستێ.

هاووڵاتییانی سەیدسادق بەهۆی پێوەستكردنیان بەئیدارەی سەربەخۆی هەڵەبجەوە هەڕەشەى خۆپێشاندان دەكەن

سەرچاوەیەك لە شارۆكەى سەیدسادق ئەمڕۆ سێشەم ڕاى گەیاند، بەیاننامەیەكمان دژ بەپەیوەستكردنى سەیدسادق بەئیدارەى سەربەخۆى هەڵەبجە دەركردووە و كاتێكمان داناوە، ئەگەر تا ئەوە كاتە وەڵامى رژد نەدرێینەوە خۆپێشاندان دەكەین.

ئەبوبەكر حوسێن یەك لە ڕێكخەرانى ئەو بەیاننامەیە بەئاژانسى كوردستان بۆ دەنگوباس (ئاكانیوز)ى گوت "خەڵكى سەیدسادق نایانەوێ چیتر ببنە قوربانى و نایانەوێ بخرێنە سەر ئیدارەى سەربەخۆى هەڵەبجە".

لە بەیاننامەیەكیشدا كە كەمپینى رێگرى لە خستنەسەر ئیدارەى هەڵەبجە لە سیدسادق دەریان كردووە و وێنەیەكى بۆ (ئاكانیوز) هاتووە، خەڵكى سەیدسادق دەڵێن "وەك هەموو لایەك ئاگەدارن لە بڕیارێكی‌ چاوەڕواننەكراوی‌ ئەنجوومەنی‌ وەزیراندا لە‌ 7 شوبات/فێبرایەردا بڕیار درا هەر 4 شارۆكەی‌ (سەیدسادق، هەڵەبجەی شەهید، هەڵەبجەی‌ تازە و پێنجوێن) بكرێنە ئیدارەی‌ سەربەخۆ، ئەم ئیدارەیەش ببرێتە هەڵەبجەی‌ شەهید كە ئەمەش بارگرانییەكی‌ تر بوَ هەرسێ شارۆكەكە دروست دەكات بەهوَی‌ دوورە دەستی ‌‌و تەریكیی‌ شارۆكەی هەڵەبجەوە، بەشێوەیەك دەبێ لەم دوَخەی‌ ئێستەش خراپتر دەبێت" .

هەڵەبجە: تا ئێستە 29 گۆڕى بەكۆمەڵ دۆزراونەتەوە

 سەرۆكى كۆمەڵەى قوربانییانى كیمیابارانى هەڵەبجە رای گەیاند، دواى ئەوەى دوێنىَ شەموو گۆڕێكى ترى بەكۆمەڵى كارەساتى 16 ئادار/مارس دۆزرایەوە، ژمارەى ئەو گۆڕە بەكۆمەڵانەى لە ناوچەكەدا دۆزراونەتەوە گەیشتە 29 گۆڕ.

halabjaلقمان عەبدولقادر بەئاژانسى كوردستان بۆ دەنگوباس (ئاكانیوز)ى ڕاگەیاند "تائێستە لە شارۆكەى هەڵەبجە و دەوروبەرى ژمارەى ئەو گۆرە بەكۆمەڵانەى دۆزراونەتەوە گەیشتووەتە 29 گۆڕ".

عەبدولقادر ڕوونى كردەوە "دوێنىَ شەموو گۆڕێكى ترى بەكۆمەڵ دۆزرایەوە كە لە ناوچەى ئەحمەد ئاوا بوو و قوربانییانى دوو ماڵباتى تێدا بووە كە ژمارەیان 19 قوربانییە".

ئاماژەى بەوەش دا "تا ئێستە ژمارەیەك لە گۆڕە بەكۆمەڵەكان پەرژین و دیواربەندیان بۆ كراوە، بڕیاریشە دیواربەند بۆ ئەوانەى تریش بكرێت".

سەرچاوەیەك: كۆمەڵەى قوربانییانی هەڵەبجە بەشداریى ڕێوڕەسمى ساڵوەگەڕى 16ی ئادار ناكات

سەرچاوەیەك لە كۆمەڵەى قوربانییانى كیمیابارانى هەڵەبجە ئەمڕۆ یەكشەم رای گەیاند، بەرامبەر جێبەجێنەكردنى داواكارییەكانمان، ئامادە نین ئەمساڵ لە 23 یەمین ساڵوەگەڕى كارەساتى كیمیابارانی هەڵەبجە لە 16ی ئادار/مارسی داهاتوودا بەشدارى بكەین.

halabjaلوقمان عەبدولقادر سەرۆكى كۆمەڵەى قوربانییانى كیمیابارانى هەڵەبجە بەئاژانسى كوردستان بۆ دەنگوباس (ئاكانیوز) ى ڕاگەیاند، وەك كۆمەڵەى قوربانییانى كیمیابارانى هەڵەبجە كە نوێنەرایەتیى زۆربەى كەسوكارى قوربانییان و شەهیدانى هەڵەبجە دەكەین، ئەمساڵ ئامادە نین بەشداریى ڕێوڕەسمى یادكردنەوەى 23 یەمین ساڵوەگەڕى 16 ئادار/مارس بكەین.

سبەى سەرۆكى هەرێمی كوردستان بەبىَ ئامادەبوونی گۆڕان لەگەڵ لایەنە سیاسییەكاندا كۆ دەبێتەوە

 ئەندامێكی مەكتەبى سیاسیى كۆمەڵى ئیسلامیى كوردستان ڕاى گەیاند سبەى سەرۆكى هەرێم لەگەڵ لایەنە سیاسییەكانى كوردستاندا كۆ دەبێتەوە، بزووتنەوەى گۆڕانیش رای دەگەیەنن ئەوان ئاگەدارى ئەو كۆبوونەوەیە نین.

عەبدولستار مەجید ئەندامى مەكتەبى سیاسیى كۆمەڵى ئیسلامیى كوردستان ئەمڕۆ سێشەم بەئاژانسى كوردستان بۆ دەنگوباس (ئاكانیوز)ى ڕاگەیاند، سبەى چوارشەم مەسعوود بارزانى سەرۆكى هەرێمى كوردستان لەگەڵ نوێنەرى لایەنە سیاسییەكانى هەرێمی كوردستاندا كۆ دەبێتەوە.

مەجید گوتى "ئەو كۆبوونەوەیە درێژەپێدەرى كۆبوونەوەكەى پێشووە كە لایەنە سیاسییەكان بۆ قسەكردن لەسەر بەیاننامەكەى بزووتنەوەى گۆڕان لەگەڵ سەرۆكى هەرێمدا كۆ بوونەوە و بەیاننامەیەكیان دەركرد".

ئاماژەی بەوەش دا "لە كۆبوونەوەكەى پێشتردا هەموومان پێمان وابوو ئەم دۆخە تەنیا بەبەیاننامەیەك چارەسەر ناكرێت، دەبێ كۆبوونەوەى ترى بەدوادا بێت و زۆر شت هەیە چارەسەرى بۆ بدۆزرێتەوە كە ئەم كۆبوونەوەیەى سبەى لەو چوارچێوەیەدایە".

سەرنووسیارى ئاوێنە: لە شارى هەولێر رۆژنامەفرۆشەكان بەقسەی مەلاكان رۆژنامەكەمانیان بڵاو نەكردەوە

 سەرنووسیارى رۆژنامەى ئاوێنە راى گەیاند، دوابەدواى بڵاوكردنەوەى ژمارە 261مینى رۆژنامەكەمان كە سێشەمى هەموو هەفتەیەك دێتە بڵاوكردنەوە، زۆربەى رۆژنامەفرۆشانى هەولێر بەپێى قسە و رێنوێنییەكانى مەلاكانەوە، رۆژنامەكەمانیان بڵاو نەكردەوە.

aoشوان محەمەد سەرنووسیارى رۆژنامەى ئاوێنە كە كۆمپانیاى ئاوێنە دەرى دەكات، بەئاژانسى كوردستان بۆ دەنگوباس (ئاكانیوز)ى گوت "سێشەمى هەموو هەفتەیەك رۆژنامەكەمان دواى بەچاپ گەیاندنى دەردەچێ، بەڵام دواى گەیشتنى بۆ شارى هەولێر و دابەشكردنى بەسەر رۆژنامەفرۆشەكانەوە، كەچى فرۆشیارى بۆ نەكرا و راگیرا و نیازى گەڕاندنەوەشیان هەیە".

"ئەگەر تا ئێستە لە كوردستاندا سانسۆرى سیاسی، یاسایی و پیاوانى ئاینى هەبووە، كەچى ئەمجارەیان سانسۆرێكى تر خۆى بەدەرخست و زیادى كردووە، ئەویش سانسۆرى چاودێریكردنى رۆژنامەفرۆان و ئەو دوكانانەیە كە رۆژنامەكان دابەش دەكەن" سەرنووسیارى رۆژنامەى ئاوێنە واى گوت.

دانیشتوانی هەڵەبجە بەگرینگییەوە لە سەربەخۆبوونی كارگێڕیی شارۆكەكەیان دەڕٍوانن

ڕاپۆرتى خەبات نەوزاد

ئێوارەى دوێنى دووشەم ئەنجوومەنى وەزیرانى هەرێمى كوردستان لە كۆبوونەوەیەكى ئاساییدا چەند بڕیارێكى دا كە بەلاى دانیشتوانی هەڵەبجەوە گرینگترینیان ناوچەكانى هەڵەبجە، راپەڕین، و سۆران بكرێنە ئیدارەى سەربەخۆ. لەم ڕاپۆرتەی ئاژانسی كوردستان بۆ دەنگوباس (ئاكانیوز)دا دانیشتوانی ئەو شارۆكەیە لەم پرسە دەدوێن.

زانا محەمەد /تەمەن 24 ساڵ/ یەك لە دانیشتوانی هەڵەبجەیە، بە(ئاكانیوز)ى گوت ئەو بڕیارە زۆر گرینگە بۆ هەڵەبجە، یەكێك لە گرفتە سەرەكییەكانى ئەم شارۆكەیە سەربەخۆنەبوونى بووە لە ڕووى كارگێڕییەوە، هاووڵاتی بۆ هەر كاروبارێك ئەستەمیی زۆری دەبینی بەهۆی ڕۆتینی زۆرەوە.

بەپێى راگەیەنراوێكى ئەنجوومەنی وەزیرانی هەرێمی كوردستان، لە تەوەرێكى كۆبوونەوەكەى دوێنێ دووشەمی ئەنجوومەنى وەزیراندا، بڕیار درا ناوچەكانى هەڵەبجە، راپەڕین و سۆران بكرێن بەپێكهاتەیەكى كارگێڕیی سەربەخۆ، هۆكارى ئەمەش بۆ ئاسانكردنى مامەڵەى هاووڵاتییانە لە ناوچەكەدا كە بۆ كاروبارەكانیان ئەستەمیی زۆر دەبینن لە هەندێك فەرمانگە و بەڕێوەبەرایەتی یاخۆ داوودەزگەى تایبەت كە لە شارەكاندا هەن.

قائیمقامى هەڵەبجە: بڕیارى سەربەخۆبوونى هەڵەبجە لە ڕووى كارگێڕییەوە جموجۆڵى ئابووریى خستووەتە ئەم شارۆكەیەوە

قایمقامى هەڵەبجە ئەمڕۆ سێشەم ڕاى گەیاند لە ماوەى كەمتر لە 24 سات بەسەر دەرچوونى بڕیارى سەربەخۆبوونى هەڵەبجە لە ڕووى كارگێڕییەوە، جموجۆڵى ئابووریى ئەو شارۆكەیە جووڵاوە و نرخى زەوی و خانوو لە هەڵەبجە بەرز بووەتەوە.

گۆران ئەدهەم قایمقامى شارۆكەى هەڵەبجە ئەمڕۆ سێشەم بەئاژانسى كوردستان بۆ دەنگوباس (ئاكانیوز)ى ڕاگەیاند ئەو بڕیارە زۆر گرینگە و خزمەتى زۆر بەهەڵەبجە دەگەیەنێت.

ئەدهەم ئەوەشی گوت "گرینگترین شت لەو بڕیارە ئەوەیە كە بۆ خۆى داواكارییەكى سەرەكیى خەڵكى هەڵەبجەیە و لەمێژە داواى جێبەجێكردنى دەكەن، ئێستەش كە بووەتە بڕیار، بەشێكى گرینگ لە داواكارییەكانیان هاتووەتە دى".

پەرلەمانتارێكی كورد لێكۆڵینەوەیەك لەسەر هەڵەبجە دەداتە پەرلەمانى عێراق

 پەرلەمانتارێكی كورد لە پەرلەمانى عێراق ئەمڕۆ یەكشەم ڕاى گەیاند، لێكۆڵینەوەیەكی لەسەر هەڵەبجە و رووداوى كارەساتى 16 ئادار/مارسى 1988ی ڕۆژی كیمیابارانی ئەو شارۆكەیە داوەتە پەرلەمانى عێراق و بڕیارە بەسەر تەواوی پەرلەمانتاراندا دابەش بكرێ.

بەكر حەمەسدیق ئەندامى پەرلەمانى عێراق لەسەر لیستى یەكگرتووى ئیسلامیى كوردستان بەئاژانسى كوردستان بۆ دەنگوباس (ئاكانیوز)ى ڕاگەیاند، لێكۆلێنەوەیەك كە لەلایەن خۆیەوە ئامادە كراوە و تایبەتە بەشارۆكەی هەڵەبجە، دراوەتە سەرۆكایەتیى پەرلەمانى عێراق.

حەمەسدیق گوتى لێكۆڵینەوەكە باسى هەڵەبجە و ڕووداوەكەی 16 ئادار/مارسى 1988 دەكات و بواری یاساییى تاوانەكەش شى دەكاتەوە بەپێى پێوەرە نێودەوڵەتییەكان.

سەرچاوەیەك لە مۆنیۆمێنتی هەڵەبجە: لە توركیا و سووریا بەهۆی ئاڵای كوردستانەوە كێشە بۆ كارێكی مۆنیۆمێنتەكەمان دروست بوو

 سەرچاوەیەك لە مۆنیۆمێنتى هەڵەبجە ئەمڕۆ شەموو ڕاى گەیاند بۆ لە چاپدانى وێنەی سەر كیسى تایبەت بەمۆنیۆمێنتەكەمان، لەبەرئەوەى وێنەی ئاڵاى كوردستانى لەسەر بووە چاپخانەكانی توركیا و سووریا ئامادە نەبوون كارەكەمان بۆ بكەن.

مەحموود حەمەئەمین بەرپرسی ڕاگەیاندنى مۆنیۆمێنتى هەڵەبجە بەئاژانسى كوردستان بۆ دەنگوباس (ئاكانیوز)ى ڕاگەیاند، مۆنیۆمێنتەكەمان بەباشى زانى لەپێناو زیاتر خزمەتكردنى ئەو میوانانەى ڕووى تێ دەكەن، بەشێوەیەكى جوان كیسى تایبەت بەخۆى لە چاپ بدات تا ئەو سیدى و كتێبانەى وەك دیكیۆمێنت پێشكێشیان دەكرێت تێیدا كۆ بكرێنەوە.

حەمەئەمین زیاترى گوت بۆ ئەو مەبەستە ڕەنگڕێژییەكی تایبەت ئامادە كرا كە رووى دەرەوەى مۆنیۆمێنتەكەیە و ئاڵایەكی كوردستان لە دەوریەتى، درایە كۆمپانیایەك تا لە چاپى بدات.

هەروەها گوتی "بۆ ئەوەى كارەكە جوانتر بێ، كۆمپانیاكە ڕەنگڕێژییەكەی بردووەتە توركیا، لەبەرئەوەى ئاڵای كوردستانى تێدا بووە، هیچ چاپخانەیەك ئامادە نەبووە ئەو كارە بكات، بۆیە بردوویەتییە سووریا، چاپخانەكانى ئەوێش ئەو كارەیان نەكردووە تا ئاڵاكە لابراوە".

شاندێكی هەرێمی كوردستان بەشداری لە زەماوەند "فێستیڤاڵ"ی عێراقی تایبەت بەئاشتەواییی نیشتمانی دەكات

سەرچاوەیەك لە وەزارەتى ئەوقاف و كاروبارى ئاینیى حكوومەتى هەرێمى كوردستان راى گەیان چەند كەسایەتییەكى هەرێمى كوردستان بۆ بەشدارى لە زەماوەندى عێراقى تایبەت بەئاشتەواییى نیشتیمانى بانگهێشتن كراون كە 7ی ئەم مانگە بەڕێوە دەچێ.

مەریوان نەقشبەندى بەڕێوەبەرى راگەیاندنى وەزارەتى ئەوقاف و كاروبارى ئاینیى حكوومەتى هەرێمى كوردستان كە خۆى بەشداریى ئەو كۆنفرانسە دەكات، بەئاژانسى كوردستان بۆ دەنگوباس (ئاكانیوز)ى ڕاگەیاند "بڕیارە رۆژی دووشەم 7 شوبات/فێبرایەر زەماوەندی عێراقی (خۆشەویستیی نیشتمان لە ئیمانەوەیە) لە هۆڵی كۆنگرەكان لە شاری كازمییەی بەغدا بەڕێوە بچێت".

نەقشبەندى گوتى "زەماوەندەكە لەلایەن دەزگای گفتوگۆی مرۆیی و بەسەرپەرشتیی گەورە مەرجەعی شیعە (حوسێن ئەلسەید ئیسماعیل سەدر/ لەژێر دروشمی (بێئومێد مەبن، بەجێمان مەهێڵن) ئەنجام دەدرێت".

پەرلەمانتارێكی عێراق: لە بودجەى ئەمساڵى عێراقدا ڕێژەیەك بۆ هەڵەبجە دیارى دەكرێت

سەرچاوەیەك لە پەرلەمانى عێراق ئەمڕۆ شەموو ڕاى گەیاند، كار بۆ ئەوە دەكەین لە بودجەى ئەمساڵى عێراقدا رێژەیەك بۆ ئاوەدانكردنەوەى هەڵەبجە و ئەو شوێنانەى وەك هەڵەبجە قوربانیى رێژیمى لێخراوی بەعسن، دیارى بكەین.
بەكر حەمە سدیق ئەندامى پەرلەمانى عێراق لەسەر لیستى یەكگرتووى ئیسلامیى كوردستان بەئاژانسى كوردستان بۆ دەنگوباس (ئاكانیوز) ى ڕاگەیاند پڕۆژەیاسای قەرەبووكردنەوەى هەڵەبجە ئامادە كراوە و پێشكێش بەلێژنەى یاساییى پەرلەمانى عێراق كراوە.

حەمە سدیق گوتى "سەرۆكى لێژنەى یاساییى پەرلەمان پڕۆژەكەى پێ باش بوو، بۆیە بەڵێنى دا بخرێتە بەرنامەى كارى پەرلەمانى عێراق و لە ئەمساڵدا خوێندنەوە بۆ ئەو پڕۆژەیە بكرێت".

زیاترى گوت "هەوڵى رژدمان داوە و بۆ ئەوەى لە بودجەى 2011ى عێراقدا ڕێژەیەك بۆ هەڵەبجە و ئەو شوێنانەى وەك هەڵەبجەیان لێ هاتووە تەرخان بكەین، ئەوە بووەتە بڕیار و لە كاتى پەسەندكردنى بودجەدا بەڕژدى داكۆكیى لێ دەكەین".

بەغدا: شەش شێوەكاری هەڵەبجە بەشداری لە پێشانگەیەكدا دەكەن

 شەش شێوەكاری گەنجی دانیشتووی شارۆكەی هەڵەبجە (81 كم باشووری رۆهەڵاتی سلێمانی) لە بەغدای پایەتەختی عێراق بەشداریی پێشانگەیەكی هاوبەشی شێوەكاری دەكەن، لە سەرەتای مانگی داهاتوودا، سەرچاوەیەك لە هونەرمەندانى هەڵەبجە ڕاى گەیاند.

halabjaئاودێر عوسمان یەكێك لە بەشدارانی ئەو پێشانگەیە بەئاژانسى كوردستان بۆ دەنگوباس (ئاكانیوز)ى ڕاگەیاند "لە دواى رووخانی رێژیمی لێخراوی عێراقەوە بۆ یەكەمجار وەك شێوەكارانى هەڵەبجە پێشەنگەیەك دەبەینە بەغداد".

پاشان گوتى "ئەو پێشەنگەیە بە هاوكاریى بنكەى وەرزش و لاوانى هەڵەبجە دێتە سازدان و 6 شێوەكارى گەنجى هەڵەبجە بەشداری تێدا دەكەن، كە برێتین لە هونەرمەندان (ئیبراهیم زۆراب، ئاودێر عوسمان، هەرێم جەمال، على ئەركادى، ئارى جاف، عبدالله میرزا)".

قوربانییانی هەڵەبجە و سەردەشت داوای قەرەبووكردنەوە‌ لە فرانس ڤان ئانرات دەكەن

سەرچاوەیەك لە رێكخراوى چاودێرى كوردۆساید ئەمڕۆ پێنجشەم راى گەیاند، ڕۆژی 31 كانوونی دووەم/یەنایەر پرسی قەرەبووكردنەوەی قوربانییانی چەكی كیمیایی لە سەردەشت ‌و هەڵەبجە لەلایەن فرانس ڤان ئانرات، لە دادگەی شاری لاهای بەڕێوە دەچێت.

قادر نادر بەرپرسى راگەیاندنى چاودێرى كوردۆساید بەئاژانسى كوردستان بۆ دەنگوباس (ئاكانیوز)ى ڕاگەیاند، بەپێی گوتەی هەردوو قوربانیی سكاڵاكار، عەلی رەحیمی شارۆكەی (سەردەشت)ی ئێران ئەندامی كۆمیتەی رۆهەڵاتی چاودێری كوردۆساید، هەروەها هونەرمەند خاتوو دانیا عەلی شارۆكەی (هەڵەبجە)، پاش نیوەڕۆی رۆژی دووشەم 31 كانوونى دووەم/یەنایەر، لەسەر پرسی قەرەبووكردنەوەی قوربانییان دانیشتنی دادگە لە شاری لاهای بەڕێوە دەچێت.

سلێمانى.. دادگە لە بەرژەوەندیی گرووپى 400 بڕیاری دا و سبەى خۆپیشاندان دەكەن

سەرچاوەیەك لە گرووپى 400 راى گەیاند بۆ یەكلاكردنەوەى چارەنووسى خۆپیشاندانمان لە شارى سلێمانى پەنامان بردە بەر دادگە و سكاڵامان تۆمار كرد، دادگە لە بەرژەوەندیى ئێمە بڕیارى داوە و سبەى سێشەم خۆپیشاندان دەكەین.

فەلاح موراد ئەندامى دەستى باڵاى گرووپى 400 و یەكێك لەو كەسانەى داواى مۆڵەى خۆپیشاندانى پێشكەشى پارێزگاى سلێمانى كردووە بەئاژانسى كوردستان بۆ دەنگوباس (ئاكانیوز)ى راگەیاند، دواى ئەوەى سێشەمی رابردوو سكاڵاى خۆمان بردە دادگە لە بەرامبەر مۆڵەتنەدان بەخۆپیشاندانەكەمان، دادگە لە بەرژەوەندیى ئێمە بڕیارى دا و بڕیارەكەى پارێزگارى بەنایاسایى لە قەڵەم دا.

گرووپى 400 بۆ دروستكردنی پاڵەپەستۆ بۆ تەواوكردنی نەخۆشخانە 400 سەرینییەكەى سلێمانى دروست بووە كە 50 رێكخراو و كەسایەتی‌ و پزیشك لەخۆ دەكرێ.

موراد گوتى، پێشتر پارێزگارى سلێمانى بەئێمەى گوت بەپێى مادەى 3ى بڕگەى 3ى یاساى خۆپیشاندان ئێوە مافى خۆپیشاندانتان نییە، بەڵام دادگە لە بڕیارەكەى خۆیدا دەڵێ ئەو بڕیارەى پارێزگار نایاسایییە و ئەو بڕگە یاسایییە رێگرى لە خۆپیشاندانى گرووپى 400 ناكات.